تجربتي مع التسمير الذاتي | My self-tan experience

السلام عليكم ،رحمة الله وبركاته ❤❤
كيفكم مع الأجواء الي خلاص قاعده تودع ؟!
وبما انه الجامعة رجعت كثير بنات يفكرون بتجديد لوكاتهم
والتان من أكثر الأشياء الي ممكن تعطيك طلة حلوة بعد عطلة صيفية
فأنا بقول لكم عن تجربتي مع السلف تانرز ❤

نبدأ أول شيء بالأساسيات أكيد كلكم عارفين قبل التان لازم فقرة تقشير وتدليك وكذا عشان تتفتح المسام وتتشرب اللون..
هذي شوية نصايح صورتها لكم من مجلة (.....)

المهم أنا مو ذاك الخبرة مع التان لكن لي تجربة معاه ❤❤
استخدمت أكثر من منتج وبعطيكم النتيجة والمميزات والسلبيات بكل واحد فيهم..

#1 أول واحد هو Delectable Self Tanning Mousse SPF15 من ماركة Clarins
قد نزلته قبل ببوست واللحين بعطيكم رأيي الشخصي فيه

هو عبارة عن كريم لونه أبيض، جربته مرتين بطريقتين مختلفتين:
 بالمرة الأولى لبست قفازات بلاستك ووزعته ع الجسم بشكل دائري كأني آحط كريم
والنتيجة كانت بالمرة شينة طلع دوائر بنية ومدري كيف شيء بشع مره وكل من شافه ضحك وتطنز!!
المرة الثانية كان في ناس ينصحون ان الكوعين والمرفقين ما احط فيهم لانهم أساساً اغمق من الطبيعي لكن اكتشفت لما سويت هالحركة انو مع التاان يبينون ترقيع يطلعون افتح ومو متناسقين مع التان..
تحطمت من هالتجربة وخلاص قررت اني ما راح آسويها مره ثانية..

لكن في يوم ما صاحبتي نجود شجعتني أرجع آتنتن -أهديها هالبوست - :d
سويت تان وغامرت بعز الدراسة يوم شفتها تَهورَت وحطت وكذا تحمست أنا اني أغامر معها فقلت نجرب التان مرره ثاانية..
بس هالمرة تعلمت من آخطائي الي قبل، رحت جبت لي اسفنجة العادية حقت المواعين قطعت منها شوي *الحاجة أم الاختراع*
واخذت أغمسها بالكريم وأطبطب ع جسمي لين مشيت علييه كله وما بقيت بقعة، طبعا تتركينه يجف ما بين ربع ساعة نص ساعة بعدين عادي اذا بتلبسين فوقه شي
الوقت مهم يا بنات ترا يقعد حوالي يمكن ست ساعات عشان يبين اللون أنا آحطه كذا بعد العشا واناام اقوم الصباح يصير اللون بدا يطلع..

سعره:
حول ٢٠٠ ريال ما أذكر بالضبط أخذته من سيفورا

مميزاته:
رطب ما يجفف الجلد قوة
تطبيقة سهل لما تستخدمين الاسفنجة وبعد تميزين الأماكن الي جاها لأنه مو شفاف لونه أبيض بحيث تغطين كل المناطق
طبعا يستمر لمدة أسبوع تقريباً
فيه نسبة حماية من الشمس

سلبياته:
ريحته شينة شوي يعني بس ما تظل كثير
سعره غالي لأنه من الماركات الهاي اند





#2 ثاني منتج هو Autobronzant Self-Tanner من ماركة Yves Rocher 
هذا سهل عااد مرره تطبيقه وأشكر صاحبتي نجود *نفسها الي فوق* :d الي دلتني عليه مرا جمييل،
هو عبارة عن بخاخ تبخين ع جسمك وتطبطبين او توزعينه بالاسفنجة انا استخدمتها نفسها حقت المواعين
وممكن تبخين ع الاسفنجة وتوزعين.. اذا نشف يمديك تلبسين ملابسك فوقه بس انتبهوا تخافون اذا ما بان اللون وتزيدون تراه شفاف ولا يبين الا بعد ست ساعات او اكثر يطوول مرره..


سعره:
حول ٥٠ ريال فرع حياة مول

مميزاته:
سهل توزيعه وسريع ما ياخذ وقت
ريحته حلوة يعني مو منفرة حبيتها انا بالعكس مع انه اختي كرهتها مررة
سعره جميل ومو مبالغ فيه ❤

سلبياته:
شفاف لو أغفلتي منطقة ممكن ما تدرين وتعيدين ع شي كم مرة ويطلع غامق بالنهاية يعني يبي له تركيز وانت تحطينه
يجفف البشرة بشكل

- الفرق بين هذولا الاثنين من ناحية اللون الأول حق كلارنس يعطي ع بني أما بخاخ ايف روشيه فيعطي ع برتقالي يعني شيبيه بالبرونزي اكثر..
حبيت درجة الثاني أكثر تبين طبيعية فأنصحكم فيه ..





أما بالنسبة للجفاف الي يجي للبشرة بعد التان فهذا حله:

"Musk by Alyssa Ashley هو قلتر بودي لوشن اخذته من الدانوب مره جميل يحفظ الترطيب لساعات وريحته جميله بس طبعا يعطي لمعه ذهبيه للجسم لذلك استخدمته مع السيلف تان .. مرره جميل مع التان خصوصا انه الجسم يجف مره مع التان فهو يحفظ لي ترطيب الجسم لساعات .. مررره ممتاز + انه يعطي لمعه ذهبيه مع اللون برونز يطلع جمميل"


- هذي تجربة صديقتي نقلتها لكم حرفيا لما شكيت لها عن الجفاف نصحتني بهذا فعلى طول دخلته لستة مشترياتي عشان تنتنتي المستقبليه إن شاء الله ❤

#3 أخيرًا Backstage Glow من Victoria's Secret
وهو عبارة عن لوشن برونزي بلمعه ذهبية..

قصتي معه اني جتني فترة هوس بالتان بس بنفس الوقت يكون عندي مناسبة وابغا اصير بيضا فيها
فصرت آبحث عن شيء تان حق يوم أو شيء مؤقت يختفي بمجرد ما تجي الموية عليه..
ولقيت هاللوشن الجميل الإنقاذ عند فكتوريا سيكرت❤❤
مجرد توزعينه ع جسمك لين يناسبك اللون وتعجبك الدرجة ولونه بني فعلى طول تطلع لك النتيجة وتشوفين اللون،
طبعا لازم ما يجيه موية، وما تلبسين عليه شي لحد عشر دقايق تقريبا حتى ما تتبقع ملابسك.

سعره:
١١٠ ريال من فيكتوريا سيكرت فرع حياة مول

مميزاته:
مؤقت يروح بمجرد الاستحمام
لون خفيف ولوك طبيعي

سلبياته:
يجفف ولما يطول عالبشرة يبدا يختفي اللون وتبقى حبوب اللمعة مو زين أبد هالشيء
ينفع بس للمناسبات القصيرة ثلاث ساعات كذا

- استفدت منه لما بدا السلف تان يروح كانت اطراف ايدي بيضا والباقي تان فكنت احط منه اخبي شوي يعني ومشى حالي..







وبس هذي تجربتي بالتفصيل الممل مع التان
نتمنى نكون أفدناكم ولو بالشيء القليل ❤
وبالنهاية لون التان مسألة ذوق فإذا أعجبك لا تهتمين بكلام الناس الي يتمصخرون ويتهزون فيك سويه وأنت واثقة من نفسك..
المهم لا تتركين بخاطرك شيء ودك فيه روحي وجربي المغامرة شعورها حلو :d
ما أدري اذا اعجبتكم التجربة وودكم نكثر من هالنوع من التدوينات شاركونا بالكومنتات بآرائكم وأفكاركم
نلقاكم في تدوينات قادمة  ❤❤

------------------

إذا حابه تنضمي لمدونتنا ليصلك كل جديد

اضغطي على الخانة الزرقاء "انضمام" في العمود يسار الصفحة

If you want to honored us by your following 

please click on the blue box on the left side of the bage

أو أضيفي ايميلك في الخانة المخصصة لتصلك التدوينات دورياً